Terceira contribución do Centro Ramón Piñeiro ao estudo e edición de novos documentos, agora epistolares, que deben contribuír á homenaxe e ao mellor coñecemento da figura de don Álvaro. Un corpus de sesenta cartas aproximadamente é o núcleo destas páxinas que contan con textos de César Cunqueiro e Xosé Luís Cochón; unha fermosísima carta de Eduardo Blanco-Amor e, finalmente tres pouco coñecidos contos do mesmo Cunqueiro. O conxunto variado e novidoso, ofrece, pois, unha valiosa indagación en aspectos da vida e obra do noso universal escritor.